SALAMAT NANAY

Syam ka bulan ang imo gin-agwanta
Wala man sa plano pero ikaw nagpadayon
Gaisahanon nga imo gintindugan
Ginhimo ang insakto sa mata sang Ginoo

Sa tunga sang kahuy-anan kag kabudlay
Wala ka nagduwa-duwa nga ipabalo sa tanan
Nakasala ka man kag nakadasma
Ikaw isa lamang ka iloy nga nagahigugma

Nagpadayon sa pagpangabuhi
Ginlukdo ang isa ka dako nga responsibilidad
Nagtindog bilang amay kag iloy
Ginhatag ang tanan sa imo mga kabataan

Ang imo mga sakripisyo
Kag luha tungod sa kahidlaw kag kasubo
Indi madulaan sang paglaom
Maga-updanay liwat sa natakda nga tiempo

Salamat sa imo pagpalangga
Paghigugma nga takos kag wala kaangay
Amon kasing-kasing nagakalipay gid
Kay ikaw ang ginbugay nga amon mangin iloy

Ang amon pangamuyo:
Kabay mangabuhi pa ikaw sing malawig
Agod amon mabalik kag mapakita
Gugma kag pasalamat nga bug-os kag takos

Halin sa amon mga tagipusuon,
Salamat Nanay!*

* A Mother's Day poem I made for my mom. Written using the local Hiligaynon dialect.